Ամառային հանգիստ

Հայկ Բադալյան

Ամառային արձակուրդի ընթացքում հանգստացել եմ Արտաշատի Քաղցրաշեն գյուղում՝ տատիկիս, պապիկիս մոտ: Մեկ ամիս անցկացրել եմ գյուղում, ֆուտբոլ և պահմտոցի եմ խաղացել, հեծանիվ եմ վարել, լողացել եմ բացօթյա լողավազանում: Ընտանիքով եղել ենք նաև Ապարանում, ձուկ ենք որսացել: 10 օր էլ հանգստացել եմ Ուռեկիում, զբոսնել եմ Բաթումիում, նավ եմ նստել ու ափից գունավոր խխունջներ եմ հավաքել:

Ամառ 2017

Դանիել Մարկոսյան

Ծնողներիս հետ մեկնեցինք Ծաղկաձորի Ոսկու Աշխարհ հանգստյան տուն, որտեղ անցկացրեցինք 5 օրյա հետաքրքիր ու հաճելի հանգիստ: Առավոտյան նախաճաշից հետո հայրիկիս և մայրիկիս հետ խաղասենյակում խաղում էինք բիլիարդ, սեղանի թենիս, ցատկոտում էի բատուտում և սահում սղարանից:  Ցերեկները լողում էինք մեծ լողավազանում, որտեղ հանդիպում էի մյուս հանգստացող երեխաներին և միասին ուրախ ժամանակ էինք անցկացնում: Ճաշից հետո զբոսնում էինք Ծաղկաձորի կենտրոնական հատվածում, ինչպես նաև քշում էի քվադրոցիկլ, հեծանիվ և ցատկում էի մեծ բատուտում: Այցելել եմ նաև ճոպանուղի, որը բավականին տպավորիչ էր: Երեկոները անց էի կացնում հանգստյան տան գեղեցիկ բակում, որտեղ կային բազմաթիվ թռչուններ՝ մեծ ջայլամներ, կաքավներ, սիրամարգ, ինչպես նաև երկու գեղեցիկ քարայծ, որոնցից մեկը բավականին չարաճճի էր: Նախավերջին օրը Ծաղկաձորի հրապարակում պատահական հանդիպեցինք հայրիկիս մորեղբորն իր կնոջ հետ և միասին հետաքրքիր երեկո անցկացրինք, իսկ առավոտյան բոլորս այցելեցինք Կեչառիս վանական համալիր, մոմ վառեցինք, աղոթեցինք և Աստծո օրհնությամբ վերադարձանք Երևան:

This slideshow requires JavaScript.

 

Իմ ամառային արձակուրդը Վրաստանում

Կարեն Ասլանյան

Իմ ամառային արձակուրդը անցկացրել եմ Վրաստանում, Ախալքալաք քաղաքում, պապիկ-տատիկիս մոտ, նաև եղել եմ Վրաստանի տարբեր քաղաքներում, իսկ նկարաշարով կպատմեմ ավելի մանրամասն։

Ամառը գյուղում

Արամ Սարքիսսյան

Ամռանը մայրիկս, փոքր քույրիկս և ես հանգստանում էինք մայրիկիս ընկերուհու գյուղում՝ Տաշիրի Կաթնառատում: Այնտեղ ինձ դիմավորեցին իմ ընկերները՝ Մանեն, Մերին և իմ սիրելի շնիկ Չապին: Մենք ամեն օր խաղում էինք, ճաշում, երեկոները զբոսնում, նկարում: Վայելում էի իսկական գյուղական կյանք. ես տեսա, թե ինչպես են կթում կովերին, կերակրում ձիերին, խոզերին, հավերին, ինչպես են մեղր ստանում մեղուներից: Չապիին ես սիրում էի իմ ձեռքով կերակրել, նա իմ ընկերն էր դարձել: Ծննդյանս յոթերորդ տարին էլ անցկացրի իմ ընկերների հետ, հետո մենք գետ գնացինք, լողացինք, խաղացինք:

Շատ եմ ափսոսում, որ Չապին ինձ հետ չէր կարող Երևան գալ: Նրան շատ եմ կարոտում: Երազում եմ նրա նման մի խելացի շուն ունենալ, պահել:

 

Ամառ 2017

Աշոտ Փանոսյան

Ամառային արձակուրդների ընթացքում ես երկու շաբաթ մասնակցել եմ Հյուսիսային դպրոցի լրացուցիչ կրթության ճամբարին, որտեղ շատ հետաքրքիր և հագեցած օրեր եմ անցկացրել:

Այնուհետև գնացել եմ Սպիտակ քաղաք՝  պապիկիս տուն և մեկ ամիս անցկացրել եմ այնտեղ: Սպիտակում ձեռք եմ բերել նոր ընկերներ, որոնց  հետ խաղացել եմ ֆուտբոլ, պահմտոցի, փետրագնդակ, քշել եմ հեծանիվ, լողացել եմ մեր բակի լողավազանում: Կարդացել եմ հեքիաթներ, զբաղվել բանավոր մաթեմատիկայով, օգնել պապիկիս և տատիկիս տնային գործերում, այգում:

Հետո հայրիկիս և մայրիկիս հետ գնացել եմ Հաղարծին, անցել եմ երազանքների իրականացման ծառի միջով: Մեկ շաբաթ եղել եմ նաև Սևանում՝ լողացել եմ, գնացել եմ Սևանավանք,  իսկ երեկոները զբոսնել եմ ծնողներիս հետ:

Դրանից հետո գնացել եմ Գառնի, Գեղարդ: Գեղարդում քար եմ նետել իմ և ծնողներիս երազանքների իրականացման համար և ինձ հաջողվել է երեք անգամ հասնել իմ նպատակին:

Մեկ շաբաթ էլ հանգստացել եմ Հանքավանում: Այնտեղ լողում էի, խաղում էի սեղանի թենիս, ֆուտբոլ, այցելում էի մարզասրահ: Երեկոյան ժամերին դիտում էինք կինոֆիլմեր, լսում երաժշտություն: Անտառում կար 2.5 տարեկան արջ: Ես հաճախ այցելում էի նրան: Նա շատ էր սիրում ուտել և խաղալ:

Վերադարձի ճանապարհին եղանք նաև Ծաղկաձորում և Կեչառիս վանական համալիրում:

Այժմ վերադարձել եմ Երևան և նախապատրաստվում եմ նոր ուսումնական տարվան:

Ուսումնական ամառ. նախագիծ

Ուսումնական ամառ. հայրենագիտական-բնագիտական նախագիծ

Նպատակը.

Սովորողների հայրենագիտական-բնագիտական ամառային գործունեության կազմակերպում

Թեման.

Մեր գյուղը /թաղը/

Պատում  գյուղի /թաղի/ մասին

Մեր գյուղի /թաղի/ մեծերը

Մեր գյուղի /թաղի/ հեղինակությունները

Հին պատեր, հին տներ, հին հուշարձաններ

Ճանապարհներ

Մեր այգին

Ով է հիմնադրել մեր այգին

Ով է խնամում մեր այգին

Այգին խնամողը պատմում է իր այգու մասին

Ես ինչ եմ արել մեր այգում

Ինչ է աճում մեր այգում

Ինչն է հետաքրքիր մեր այգում

Մեդիանյութեր

• Ֆոտոշարք՝ տատեր, պապեր, տոհմածառ
• Հարցազրույցներ
• Ընտանեկան արշավներ

Ամառային բնագիտություն. նախագիծ

Բովանդակությունը և կազմակերպումը  

Բույսեր ենք հավաքում աշխարհի տարբեր ծայրերից

Սովորողը կամ նրա բարեկամը ուր գնում է, այնտեղից բույս կամ բույսի կտրոն է բերում:  Ինքնուրույն կամ մեծի օգնությամբ հավաքում է տեղեկություններ այդ բույսի մասին:
Բույսի անունը, խնամքը, ինչպիսի պայմաններում է աճում, ինչ հաճախականությամբ պետք է ջրել, ինչ բնավորություն ունի:  Տնկում է, խնամում և այդ մասին պատմում է /ձայնագրում, տեսագրում/:

Ստեղծում են ընտանեկան թաղարներ:

Ամառային ճամփորդություն

Ամառային արձակուրդի ընթացքում մեկնելով ճամփորդության քաղաքից, երկրից դուրս, կամ որևէ հանգստավայր, գյուղ, բարեկամ-հարազատների տուն, առաջարկում եմ պատմել ձեր ամառային ճամփորդության մասին: Պատումն իր մեջ կարող է ներառել.

• տեղեկություններ տվյալ վայրի, տեղանքի մասին.
• այցելությունների, արկածների, առօրյայի, անսովոր ու սովորական դեպքերի, դիպվածների, հանդիպումների, ստացած տպավորությունների մասին պատում:

Թեման կարող եք ներկայացնել ֆոտոշարքի, տեսանյութի, հարցազրույցի, պատումի տեսքով:

Մաթեմատիկական խաղերի կայքեր.

Տրամաբանական խաղեր.

Զարգացնող խաղեր

Ընթերցանության նյութեր.

Հովհաննես Թումանյան «Հեքիաթներ» կամ ինքդ ընտրիր  մի գիրք /ստեղծագործությունկարդա, պատմիր կարդացածիդ մասին այնպես, որ ընկերներդ էլ ուզեն կարդալ այդ գիրքը:

Ընթերցելուց հետո առանձնացնո՛ւ մի հեքիաթ կամ գիրք, որը շատ ես հավանել և ներկայացրո՛ւ՝

• աուդիո կամ վիդեո տարբերակով. երբ գեղեցիկ ընթերցում ես (նաև դերային ընթերցմամբ) ու քեզ ձայնագրում-տեսագրում են:
• գրում ես, թե կարդացածդ գիրքը, հեքիաթը ինչի մասին է, ինչու է այն քեզ դուր եկել, ինչու ես խորհուրդ տալիս, որ մյուսներն էլ կարդան: Այդ հեքիաթի կամ գրքի համար համակարգչային նկարչական ծրագրով նկար պատրաստիր:
• Հեքիաթից դուրս գրի՛ր քեզ դուր եկած հատվածներն ու ձևավորիր:
• Կարող ես հեքիաթի կամ գրքի հերոսին, հեղինակին նամակ գրել:
• Ընթերցածդ հեքիաթից, գրքից հավաքիր, գրանցիր բոլոր այն բառերը, որոնք ընթերցելիս չէիր հասկացել: Կարող ես մեծերի կամ բառարանի օգնությամբ գտնել քեզ անհասկանալի բառերի բացատրությունը: